वीरगञ्ज, पर्सा ।
विशेष सूचनाको आधारमा प्रहरीले वीरगञ्ज महानगरपालिका–२ घुसुकपुर इदगाह चोक सडकखण्डबाट श्रोत नखुलेको करिब १४ लाख १३ हजार ५०० रुपैयाँ हुण्डी रकमसहित दुई जनालाई नियन्त्रणमा लिएको छ ।

भदौ ५ गते साँझ करिब १६:२० बजेको समयमा भारतीय नम्बर प्लेटको मोटरसाइकल (BR05 AB 7761) र प्रदेश २–०३–००२ प ५५४४ नम्बरको मोटरसाइकल रोकी खानतलासी गर्दा पर्सा घुसुकपुरका ३९ वर्षीय संजय कुमार साह र बारा महागढीमाई–४ का ४१ वर्षीय शनि कुमार ठाकुरलाई पक्राउ गरिएको हो ।

उनीहरूले प्रयोग गरेको मोटरसाइकलमा फल्स सिलिङ बनाइ लुकाइ राखिएको अवस्थामा नेपाली रुपैयाँ १००० दरका नोट १० लाख र ५०० दरका नोट ४ लाख १३ हजार ५०० फेला परेको प्रहरीले जनाएको छ ।

जम्मा १४ लाख १३ हजार ५०० रुपैयाँ हुण्डी रकम बरामद भएपछि उनीहरूलाई नियन्त्रणमा लिइ मुलुकी अपराध संहिता २०७४ को दफा १२५ (क) बमोजिम हुण्डी कारोबारसम्बन्धी कसूरमा मुद्दा दर्ता गरी जिल्ला अदालत पर्साबाट पाँच दिनको म्याद लिई थप अनुसन्धान भइरहेको जिल्ला प्रहरी कार्यालय पर्साले जानकारी दिएको छ ।